ఢిల్లీలో ఘనంగా తెలుగు వెలుగు సంబరాలు

ఢిల్లీలో ఘనంగా తెలుగు వెలుగు సంబరాలు

డా. సి. నారాయణరెడ్డి జయంతి వేడుకలకు కేంద్ర మంత్రి భూపతిరాజు శ్రీనివాస్ వర్మ హాజరు

తెలుగు భాష పరిరక్షణకు అందరూ కృషి చేయాలి : కేంద్ర మంత్రి

రజని వాయిస్ : న్యూఢిల్లీ బ్యూరో

దేశ రాజధాని న్యూఢిల్లీలోని ఆంధ్ర అసోసియేషన్ హాల్లో మంగళవారం జరిగిన తెలుగు వెలుగు సంబరాలు – జ్ఞానపీఠ పురస్కార గ్రహీత డాక్టర్ సి. నారాయణరెడ్డి జయంతి వేడుకలు సాహిత్య, సాంస్కృతిక వైభవంతో ఘనంగా నిర్వహించారు. ఈ కార్యక్రమానికి సభాధ్యక్షులుగా కేంద్ర ఉక్కు, గనుల శాఖ మంత్రి భూపతిరాజు శ్రీనివాస్ వర్మ హాజరై మాట్లాడారు.

తెలుగు భాషను కాపాడుకోవాల్సిన అవసరం ఎంతో ఉందని, న్యూఢిల్లీలో ఇలాంటి తెలుగు సాహిత్య కార్యక్రమాలు జరగడం గొప్ప విషయమని ఆయన పేర్కొన్నారు. ఇటువంటి కార్యక్రమాలు దేశవ్యాప్తంగా ఉన్న తెలుగు వారిని ఒకే వేదికపైకి తీసుకువస్తాయని, తెలుగువారు తమ మాతృభాషలో మాట్లాడే అలవాటు పెంపొందించుకోవాలని సూచించారు. తెలుగు సారస్వత పరిషత్ నిర్వహిస్తున్న విభిన్న సాహిత్య కార్యక్రమాలను ఆయన అభినందించారు.

ఆచంట శాసనసభ్యులు పితాని సత్యనారాయణ, ఆక్వా రంగ ప్రముఖుడు ఉద్ధరాజు కాశీ విశ్వనాథరాజు తెలుగు భాష, సాహిత్యానికి అందిస్తున్న సేవలను కేంద్ర మంత్రి ప్రశంసించారు.

“ప్రాంతాలు వేరైనా తెలుగు ఒకటే” : కే. లక్ష్మణ్

కార్యక్రమానికి ముఖ్య అతిథిగా హాజరైన రాజ్యసభ సభ్యులు కే. లక్ష్మణ్ మాట్లాడుతూ, తెలుగు రాష్ట్రాలు పరిపాలనా పరంగా విడిపోయినా భాష ఒకటేనని అన్నారు. “ప్రాంతాలు వేరైనా మనం అందరం ఒక్కటే” అని డాక్టర్ సి. నారాయణరెడ్డి చెప్పిన సందేశాన్ని గుర్తుచేశారు. రెండు తెలుగు రాష్ట్రాలు సమానంగా అభివృద్ధి చెందాలని ఆకాంక్షించారు.

విద్యార్థులు తెలుగు మాట్లాడేలా, చదివేలా, రాసేలా ప్రోత్సహించాల్సిన అవసరం ఉందని పేర్కొంటూ, జాతీయ తెలుగు సారస్వత పరిషత్ నిర్వహిస్తున్న కవిసమ్మేళనాలు, సాహిత్య కార్యక్రమాలను అభినందించారు. హస్తినలో ఈ కార్యక్రమాన్ని నిర్వహించడం మంచి ప్రక్రియ అని అభిప్రాయపడ్డారు.

“తెలుగు ఎక్కడైతే అక్కడ నేనున్నా” : బీదా మస్తాన్‌రావు

రాజ్యసభ సభ్యులు బీదా మస్తాన్‌రావు మాట్లాడుతూ, తెలుగు భాషపై తనకున్న అభిమానాన్ని వ్యక్తం చేశారు. భీమవరంతో తన అనుబంధాన్ని గుర్తుచేసుకుంటూ, తెలుగు భాషా కార్యక్రమాలు ఎక్కడ జరిగినా తాను తప్పక హాజరవుతానని తెలిపారు.

జాతీయ వాగ్దేవి జీవిత సాఫల్య పురస్కారాలు ప్రదానం

ఈ సందర్భంగా జాతీయ వాగ్దేవి జీవిత సాఫల్య పురస్కారాలు క్రింది ప్రముఖులకు అందజేశారు:

• ఆచంట ఎమ్మెల్యే పితాని సత్యనారాయణ
• ఆక్వా పితామహుడు ఉద్ధరాజు కాశీ విశ్వనాథరాజు
• గోదావరి గ్లోబల్ యూనివర్సిటీ ఛాన్సలర్
• తిరుమల తిరుపతి దేవస్థానం చెందిన ఆకెళ్ల విభీషణ శర్మ
• తెలంగాణ సాహిత్య అకాడమీ కార్యదర్శి బాలాచారీ
• ప్రముఖ సినీ నిర్మాత తుమ్మలపల్లి రామసత్యనారాయణ
• ఉస్మానియా విశ్వవిద్యాలయం తెలుగు శాఖ పూర్వాధ్యక్షులు కసిరెడ్డి వెంకటరెడ్డి

విశేష ప్రతిభా పురస్కారాలతో పలువురికి గౌరవం

తదుపరి జాతీయ వాగ్దేవి విశేష ప్రతిభా పురస్కారాలు గొట్టుముక్కల గాంధీ భగవాన్‌రాజు, కంతేటి వెంకట్‌రాజు, ముత్యాల శ్రీనివాస్, ఈతకోట భీమశంకరరావు, జక్కంపూడి లక్ష్మీనరసింహ నాగేంద్రకుమార్, సుమన్ మచ్చ, పద్మవర్మ అల్లూరి, బడే సాబ్, కొట్టే సాయిప్రసాద్, ఆరేటి ప్రకాశ్, ఢిల్లీ వసంత్, కాగిత వెంకటరమణారావు, పెనుమట్స అర్జున్‌రాజు, కే. సురేంద్ర, మంగళంపల్లి సూర్యనారాయణమూర్తి, అల్లూరి రవివర్మ, డా. కే. సుధీరమణ, ఎస్. రాజశేఖర్‌రెడ్డి, చంద్రభట్ల శ్రీనివాస్, బొల్లు రామ్మోహన్, డా. ఆదినారాయణ తదితరులకు ప్రదానం చేశారు.

కళాకారుల అద్భుత ప్రదర్శనలు

సుమారు 70 మంది కళాకారులు సాహిత్య, సంగీత, నృత్య ప్రదర్శనలతో సభికులను అలరించారు. పురస్కార గ్రహీతలను శాలువాలు, మెమెంటోలతో నిర్వాహకులు సత్కరించారు.

జాతీయ తెలుగు సారస్వత పరిషత్ కార్యనిర్వాహక అధ్యక్షులు కేశిరాజు రాంప్రసాద్ సేవలను సభికులు ప్రత్యేకంగా అభినందించారు. రాంప్రసాద్ మాట్లాడుతూ కార్యక్రమ విజయానికి సహకరించిన ప్రతి ఒక్కరికీ పేరుపేరునా కృతజ్ఞతలు తెలిపారు.

“హస్తినలో తెలుగు జెండా ఎగరేసిన మహాకవి” : వక్తలు

డాక్టర్ సి. నారాయణరెడ్డి సాహిత్య మహిమను స్మరించుకుంటూ వక్తలు భావోద్వేగ ప్రసంగాలు చేశారు. “అక్షరానికి జ్ఞానపీఠ మకుటాన్ని తొడిగి హస్తినలో తెలుగు జెండా ఎగరేసిన మహాకవి డాక్టర్ సి. నారాయణరెడ్డి” అని కొనియాడారు. అలాంటి మహాకవి జయంతిని ఢిల్లీలో తెలుగు వెలుగు సంబరాల రూపంలో నిర్వహించడం తెలుగు జాతికి గర్వకారణమని పేర్కొన్నారు.

నిర్వాహకులు

ఈ కార్యక్రమాన్ని జాతీయ తెలుగు సారస్వత పరిషత్ అధ్యక్షులు ముత్యాల శ్రీనివాస్, కార్యనిర్వాహక అధ్యక్షులు కేశిరాజు రాంప్రసాద్, ట్రెజరర్ డా. సుధీరమణ, పద్మవర్మ అల్లూరి, అల్లూరి రవివర్మ, చంద్రభట్ల శ్రీనివాస్, చెరుకు మహేశ్వర శర్మ, పరశురాం తదితరులు సమన్వయం చేశారు. కార్యక్రమానికి అల్లూరి రవివర్మ వ్యాఖ్యాతగా వ్యవహరించారు.